Ўзбекистонда ногиронлиги бор ўқувчилар учун ижтимоий такси йўлга қўйилди

Тошкент, Самарқанд ва Андижонда ихтисослаштирилган мактаб ва мактаб-интернатларда таҳсил олаётган ногиронлиги бор болалар учун имтиёзли такси йўлга қўйиш бўйича синов лойиҳаси ишга туширилди. У Ижтимоий ҳимоя миллий агентлиги томонидан Yandex Uzbekistan билан ҳамкорликда амалга оширилмоқда, дея хабар беради компания.

Лойиҳа доирасида ногиронлиги бўлган мактаб ўқувчилари мактабга таксида етиб келиши мумкин бўлади. Давлат транспорт харажатларини қоплайди — ҳар бир бола учун ойига базавий ҳисоблаш миқдорининг 1,2 бараваригача (450 минг сўм). Компенсация имтиёзларни тақдим этиш шартларига қараб, саёҳат нархининг 60 ёки 100% гача қисмини қопланиши мумкин.

«Биз ҳар бир бола, соғлиғидан қатъи назар, таълим олиш ва ижтимоий ҳаётда тенг имкониятга эга бўлиши учун изчил шарт-шароитлар яратяпмиз. Бу лойиҳа фақат транспорт муаммосини ҳал қилибгина қолмайди. Бу оилалар ишончини мустаҳкамлаш, ҳаёт сифатини яхшилаш, ногиронлиги бор болаларнинг таълим жараёни ва жамият ҳаётида тўлиқ иштирокини таъминлашга қаратилган муҳим қўллаб-қувватлаш чораси», — таъкидлади ИҲМА.

Саёҳатларга Yandex Go мобил иловаси орқали буюртма бериш мумкин, улар «Комфорт» тарифига асосланади. Буюртма беришда «Мен ногиронлар аравачасида бўламан» ёки «Машинани топишга ёрдам беринг» каби махсус имкониятлар мавжуд. Ҳайдовчи хабарномани олади ва ёрдам беришга тайёр бўлади.

Компания Yandex Go ушбу буюртмалардан даромад олмаслигини таъкидлади: давлат томонидан тўланадиган барча маблағлар тўғридан-тўғри ҳайдовчиларга ўтади. Хизмат бундай буюртмалар учун комиссия олмайди.

«Технологиялар ёрдамида биз одамлар учун қандайдир муаммоларни ҳал қиладиган ёки имконият яратадиган маҳсулот ва хизматлар ишлаб чиқарамиз. Шаҳар инфратузилмасини яхшилаш ва уни ҳамма учун очиқ қилишга ҳисса қўшиш — айнан мана шу қадриятлардан бири», — дейди Yandex Uzbekistan раҳбари Иззат Шукуров.

Иштирокчилар орасида мустақил ҳаракат қилишда қийналадиган ногиронлиги бор болалар, масалан, кўриш қобилияти бузилган, таянч-ҳаракат тизими касалликлари ёки ақлий заифликнинг оғир шакллари мавжуд болалар бўлиши мумкин.

Имтиёз беришнинг батафсил шартлари 2025 йил 28 февралдаги 132-сонли алоҳида таълимга муҳтож болалар учун таълим шароитларини яхшилаш тўғрисидаги қарорда кўрсатилган.

Сифат назорати ва тезкор қайта алоқа агентлик ҳузуридаги «Ахборот технологиялари маркази» давлат муассасасининг колл-маркази томонидан амалга оширилади. Дастур иштирокчилари рўйхати «Ягона миллий ижтимоий ҳимоя» ахборот тизимида шакллантирилади. Унда ўқувчилар ва уларнинг қонуний вакиллари ҳақида маълумотлар бўлади.

Эслатиб ўтамиз, 2024 йил ноябрь ойида ИҲМА Тошкентда Yandex Go билан биргаликда ногиронлиги бор шахслар учун «Ижтимоий такси» лойиҳасини ишга туширганини маълум қилганди. Хизмат иловада нарх ўзгармаган ҳолда махсус функцияларни, масалан, ногиронлар аравачасидаги фойдаланувчиларга ёрдам, нутқи ва эшитиш қобилияти заиф одамлар учун чатни ўз ичига олади.