Урганчда Ал-Хоразмий университети очилади, у сунъий интеллект ва аэрокосмик муҳандислик мутахассисларини тайёрлайди

Шавкат Мирзиёев 30 апрель куни Ал-Хоразмий университетини ташкил этиш бўйича тақдимот билан танишди.

Президент матбуот хизматига кўра, давлат раҳбари 2022 йил августда Урганч шаҳридаги Ал-Хоразмий шаҳарчаси қурилишига асос солган, у ерда ушбу олим номидаги университет ва ихтисослаштирилган мактаб ҳам бўлади. Тақдимотда мазкур таълим масканларини ташкил этиш чора-тадбирлари, асосий йўналишлари ҳақида ахборот берилди.

Университетда 3 та: математика ва информатика факультети, аэрокосмик технологиялар муҳандислиги факультети ҳамда сунъий интеллект факультети бўлади. Уларда иқтисодиёт, ахборот технологиялари, саноат, хавфсизлик, энергетика ва экология каби соҳалар учун мутахассислар тайёрланади. Дарслар ўзбек ва инглиз тилларида, кредит-модуль тизими асосида олиб борилади.

Ўқув жараёнлари «Янги Ўзбекистон» университетининг тажрибаси асосида, БАА, Хитой, Буюк Британия каби давлатларнинг нуфузли олий таълим ташкилотлари билан ҳамкорликда ташкил этилади.

Қабулни 2025−2026 ўқув йилидан бошлаш режалаштирилган. Жами талабалар сони 4−6 минг атрофида бўлиши кўзда тутилган.

Шаҳарча ҳудудида Тошкентдаги Муҳаммад ал-Хоразмий мактабининг филиали ҳам ташкил этилади. Унга 4-синф битирувчилари танлаб олинади. Таълимнинг якунловчи 2 йили муҳандисликка бошланғич тайёргарликка қаратилади. Яъни ихтисослаштирилган мактабнинг муҳандислик таълим дастурлари Ал-Хоразмий университети бакалавриат таълим дастурлари билан ўзаро интеграция қилинади.

Муҳандислик таълим дастурларини лозим даражада ўзлаштирган битирувчиларга ўз ўқишини ушбу университетнинг тегишли бакалавриат таълим йўналишида 2-босқичдан давом эттириш имкони яратилади.

Президентнинг тегишли қарорига кўра, В.И.Романовский номидаги Математика институтининг Урганч филиали фаолияти университет биносида йўлга қўйилади ҳамда ҳар бир илмий ходимга талаба бириктириш амалиёти жорий қилинади. Университетда таълим жараёни давлат гранти ва тўлов-контракт асосида амалга оширилади. Университет ҳузурида Саноат кенгаши ва салоҳиятли талабалар учун Саноат ҳамкори стипендияси ташкил этилади.

Давлат раҳбари университет ҳудуди нафақат таълим, балки Хоразмнинг тарихий-илмий ва туризм салоҳияти билан уйғун мажмуа бўлиши кераклигини таъкидлади.