Путин 8 майдан бошлаб уч кунлик сулҳ эълон қилди

Иккинчи жаҳон урушида қозонилган ғалабанинг 80 йиллиги нишонланадиган кунларда сулҳ эълон қилинади. Бу ҳақда Кремль хабар берди. Қарор «инсонпарварлик мулоҳазаларидан келиб чиқиб» қабул қилинган.

Сулҳ 7 майдан 8 майга ўтар кечаси соат 00:00 дан эълон қилинади. У 10 майдан 11 майга ўтар кечаси соат 00:00 да тугайди. «Бу даврда барча жанговар ҳаракатлар тўхтатилади», — дея маълум қилди Кремль. Ўз навбатида, Украина томони «ушбу намунага эргашишга» чақирилган.

Агар Украина ўт очишни тўхтатишни бузса, Россия ҳарбийлари «адекват ва самарали жавоб қайтаради», дея қўшимча қилди Кремль.

Россия томони Украина инқирозининг асл сабабларини бартараф этишга қаратилган олдиндан ҳеч қандай шартларсиз тинчлик музокараларига, халқаро шериклар билан конструктив ҳамкорликка тайёрлигини яна бир бор маълум қилади, дейилади хабарда.

Путин бундан аввал Пасха байрамида сулҳ эълон қилганди. У 19 апрелдан 21 апрелгача давом этган. Россия президентининг таъкидлашича, ўт очишни тўхтатиш вақтида жанговар ҳаракатлар фаоллигининг пасайиши кузатилган. Шу билан бирга, ҳар икки томон бир-бирини ўт очишни тўхтатиш режимини бузганликда айблаган.

Киев Москва томонидан 2935 та қоидабузарлик қайд этилганини айтган, Москва эса Киев томонидан 4900 та қоидабузарлик қайд этилгани ҳақида хабар берган.

Шунга қарамай, Зеленский Киев камида 30 кун давомида узоқ масофали дронлар ва ракеталар билан фуқаролик инфратузилмасига ўзаро зарба беришдан воз кечишни таклиф қилишини билдирган.

Ўтган ҳафта АҚШ президенти Дональд Трамп Путин можарони тўхтатмоқчи эмаслигини тан олди ва Россияга яна иккиламчи санкциялар билан таҳдид қилди. Трампнинг фикрича, Москвада сўнгги бир неча кун ичида Украинага зарба бериш учун ҳеч қандай сабаб йўқ эди. Бунгача Америка етакчиси 24 апрелга ўтар кечаси Киевга берилган зарбаларга изоҳ бериб, «уларга зарурат йўқ, жуда ноқулай вақт» деган эди. Владимир, тўхта! — деганди Трамп ўшанда.

Россия Мудофаа вазирлиги ўшанда «Украинанинг авиация, ракета-космик, машинасозлик ва зирҳли танклар саноати, ракета ёқилғиси ва порох ишлаб чиқариш корхоналарига оммавий зарба» берилганини маълум қилган, Кремль эса Пасха байрами муносабати билан эълон қилинган сулҳ тугаганини ва «ҳарбийлар махсус ҳарбий операцияни давом эттираётганини» эслатганди. Кейинроқ Оқ уй раҳбари Путин унинг зарбаларни тўхтатиш ҳақидаги чақириғини эшитишига ишонч билдирди.