Бу ҳақда EurasiaPluse ахборот агентлиги хабар берди.
Наманган вилояти ЙҲХБ бошлиғи Мансур Газиев автомобилларни ижарага берувчи Telegram гуруҳ ва каналларининг аксарият аъзолари мактаб ўқувчиларидан иборатлигини маълум қилди, дея хабар берди Daryo.
«Бот-бот тилга олинаётган „Наманган езда“ канали аудиториясини таҳлил қилдик. 3200 нафар аъзосидан бор-йўғи 150 нафарга яқини автомобилларни ижарага берувчилар, қолган 90 фоизи вояга етмаганлар, асосан, мактаб ўқувчилари», — деган вилоят ЙҲХБ бошлиғи.
Мансур Газиевга кўра, автомобилларни ижарага берувчилар билан бирма-бир мулоқот қилиниб, вояга етмаганларга машиналарни бериб юборишнинг ёмон оқибатлари ҳақида огоҳлантирилмоқда.
«Суҳбат жараёнларидан маълум бўляптики, бундай шахсларнинг кўпчилиги ўзи автомобилини ижарага олган ёки кредит тўлаётганлар. Агар ўзи машинасини бошқариб, кўчага чиқса, кунига 200−300 минг сўм топиши мумкин. Ижарага бериб юборса, соатига шу пулни топяпти. Аммо автомобилни олган болалар нобуд бўлаётгани ёки ногирон бўлиб қолаётгани ҳақида ўйлашмаяпти. Автомобилига шикаст етказгани учун болалар ва уларнинг ота-оналари бўйнига 10−20 миллион сўм қарз илиб қўйилган ҳолатлар бор», — деган Мансур Газиев.
Таъкидланишича, автомобилини вояга етмаганларга ижарага бераётган шахсларга нисбатан жазо чораларини кучайтириш юзасидан тегишли таклифлар берилган. Бу борада депутатлар, жамоатчилик фаоллари ва ОАВ вакиллари билан ҳамкорликда ишланмоқда.
Аввалроқ Қонунчилик палатаси депутати Дилмурод Исмоилов автомобилларни ноқонуний ижарага бериш ва у келтириб чиқараётган оғир оқибатлар юзасидан транспорт ва ички ишлар вазирларига сўров юборганди.
Наманганда ижарага олингани машиналар билан тез-тез ЙТҲлар содир бўлиб туради.
Хусусан, 2024 йилнинг октябрида Наманган шаҳрида Gentra автомашинасини 200 минг сўмга ижарага олган 5 нафар ўқувчи катта тезликда йўлнинг қарама-қарши қисмига чиқиб кетиб, юк машинаси билан тўқнашган. Оқибатда улардан 3 нафари вафот этган. Бу йил бошидан буён шаҳарда машина ижарага олган ўқувчилар иштирокида содир бўлган тўртинчи ЙТҲ бўлган.
Ноябрь ойида яна Наманган шаҳрида икки нафар 9-синф ўқувчиси Gentra машинасида ЙТҲга учраган, улардан бири ҳалок бўлган. Улар машинани 150 минг сўмга вақтинча ижарага олган.
2025 йилнинг 6 апрель куни Давлатобод туманида икки мактаб ўқувчиси Nexia 3 машинасида ЙТҲга учраб, оғир аҳволда шифохонага ётқизилган. Улар машинани 150 минг сўмга вақтинча ижарага олган. 15 апрель куни эса Янги Наманган туманида 2 нафар 8-синф ўқувчиси иштирокида ЙТҲ содир бўлган. Улар машинани 1 млн сўм эвазига 8 соатга ижарага олган.
Фото: gazeta.uz сайтидан олинди