Бу ҳақда EurasiaPluse ахборот агентлиги хабар берди.
АҚШ президенти Дональд Трамп The Atlantic журналига интервью бериб, ҳокимиятга қайтиши, давлат раҳбари сифатидаги фаолиятини баҳолади ҳамда Украина ва Россия президентлари Владимир Зеленский ва Владимир Путинга муносабати ҳақида гапирди. «Газета.uz» суҳбатдан қисқача парчаларни тақдим этади.
Оқ уйга қайтиш ҳақида
«Мен жуда ижобий фикрлайдиган одамман. Ортга қайтишни хоҳлайманми, деб ўзимга савол бердим, лекин ҳеч қачон бу ишни қила олмайман, деб ўйламагандим».
«Ўйлагандимки, хоҳламасам керак, лекин агар хоҳласам, ғалаба қозонаман. Мен буни ҳеч қачон қайтиш деб ҳисобламаганман. Кўпчилик буни қайтиш деб атаяпти. Кўпчилик буни тарихдаги энг буюк сиёсий қайтиш деб атаяпти. Бу шараф, лекин мен буни қайтиш сифатида кўрмаяпман. Мен шунчаки олдинга интиламан».
Президентлик ҳақида
«Биринчи марта [Трампнинг 2016 йилдан 2020 йилгача бўлган биринчи муддати — таҳр.] мен иккита нарсани қилишим керак эди — мамлакатни бошқариш ва омон қолиш. Иккинчисида эса мамлакатни ва дунёни бошқаряпман».
«Мен нима қилаётганимни ҳисобга олсам, маза қиляпман. Биласизми, мен қилаётган иш — жуда жиддий иш»
2028 йилда номзодини қўйиш имконияти ҳақида
«Мен буни қилмоқчи эмасман. Ва бу жуда қийин бўлади, деб ўйлайман. Лекин [одамлар] менга бақиришади: «Йўқ, йўқ, сиз номзодингизни қўйишингиз керак».
АҚШ Конституцияси бунга йўл қўймаса ҳам, авваллари Трамп мунтазам учинчи муддатга президентликка номзодини қўйиш имконияти ҳақида гапирган. Март ойи охирида у конституциявий тақиқни четлаб ўтишнинг «усуллари» борлигини айтганди.
«Сигналгейт» ҳақида
«Балки Signal’дан фойдаланмаслик керакдир? Мен бу одамларга Signal’дан фойдаланмасликни маслаҳат берган бўлардим, гарчи кўпчилик ундан фойдаланган бўлса ҳам. Пит [Ҳегсет] оғир даврни бошдан кечирди. Бу унга жуда қаттиқ таъсир қилди. Лекин мен у билан ижобий гаплашдим».
«Сизда мудофаа котиби [президент Жо Байден маъмуриятидаги АҚШ Мудофаа вазири Ллойд Остин — таҳр.] бор эди, у бир ҳафта давомида ғойиб бўлган ва унинг қаердалигини ҳеч ким билмай қолганди. Хоҳлаймизми ёки йўқ, эҳтимол, Афғонистон мамлакатимиз тарихидаги энг шармандали лаҳза бўлган. Мен Баграм авиабазасини сақлаб қолган бўлардим, чунки у Хитой мудофаа қуроли ишлаб чиқарадиган жойга яқин жойлашган. Аммо сизда ушбу бутун фалокатга сабаб бўлган ишни қилган мудофаа вазири бор эди ва, биласизми, менимча, бу анча, анча ёмонроқ»
«Сигналгейт» (Signalgate) — АҚШнинг ҳусийларга қарши ҳарбий амалиёти ҳақидаги махфий маълумотларнинг сизиб чиқиши билан боғлиқ сиёсий жанжал. Жанжалга The Atlantic бош муҳаррири Жеффри Голдбергнинг у тасодифан Signal мессенжеридаги юқори мартабали амалдорлар, жумладан, АҚШ мудофаа вазири Пит Ҳегсет ва АҚШ вице-президенти Жей Ди Вэнс Ямандаги ҳусийлар позицияларига зарбаларни муҳокама қилган гуруҳ чатига қўшилиб қолганини ёзган мақоласи сабаб бўлган.
Зеленский ва Путин ҳақида
АҚШнинг Украинани янада қўллаб-қувватлаш режалари ва қурол-яроғ таъминотини ошириш бўйича сўралганда, у шундай деди: «Қуролнинг кўп турлари мавжуд. Бу ўқли қурол бўлиши шарт эмас. Бу санкцияли қурол бўлиши мумкин. Банк тизими билан боғлиқ қурол бўлиши мумкин».
Россия президентининг хатти-ҳаракатлари Трампни «Мен Зеленский томонидаман» дейишга мажбур қила оладими, дея сўралди: «Айнан Зеленский тарафида эмас, лекин Украина тарафидаман, ҳа. Мен Зеленский билан қийинчиликларга дуч келдим. Сиз буни шу ерда, у айнан ушбу креслода ўтирганида кўрдингиз [февраль ойи охирида Оқ уйда Украина етакчиси билан бўлган тортишув — таҳр.]. У қилиши керак бўлган ягона нарса сукут сақлаш эди, тушуняпсизми?.. Кўрамиз, келаси ҳафталарда нималар содир бўларкин. Биз сўнгги босқичга етиб келдик».
Фото: gazeta.uz сайтидан олинди