Бу ҳақда EurasiaPluse ахборот агентлиги хабар берди.
Канада бош вазири Марк Карни бошчилигидаги ҳукмрон Либерал партия мамлакат парламенти сайловларида ғалаба қозонмоқда, деб хабар берди Канаданинг CBC ва CTV News. телерадиокомпаниялари.
Телеканалларнинг таъкидлашича, партия Жамоалар палатасида мутлақ кўпчиликни — 343 мандатдан 172 мандатни қўлга киритиши ҳақида гапиришга ҳали эрта. CTV ҳисоб-китобларига кўра, либераллар 168 округда етакчилик қилган ёки сайланган, улардан кейин 144 округ билан консерваторлар бор. Агар либераллар кўпчиликни қўлга кирита олмаса, улар кичик партиялардан бири билан қўллаб-қувватлаш бўйича келишиб олишлари керак бўлади.
Карни «кучли мандат»га эга бўлишни кутганди, аммо ҳатто озчилик ҳукумати ҳам либераллар учун мўъжизадек кўринмоқда, дея таъкидлади CBC. 2024 йил охирида ўтказилган сўровлар Пьером Пуальевр бошчилигидаги Консерватив партия либераллардан олдинда эканини кўрсатди ва канадаликлар собиқ бош вазир Жастин Трюдодан норози эди. Бироқ январь ойи бошида Трюдонинг истеъфоси, АҚШ билан савдо уруши ва Америка президенти Дональд Трампнинг Канада АҚШнинг 51-штати бўлиши кераклиги ҳақидаги доимий нутқлари ўртага чиқди. Бу сиёсий сценарийни бутунлай ўзгартириб юборди ва партияларнинг сайловолди кампанияси кўп жиҳатдан Канадани глобал ноаниқликдан ким яхшироқ олиб ўтиши учун пойгага айланди, деб ёзади CBC.
Карни ўзининг Оттавадаги ғалаба нутқида консерваторларга «матонатли кампания» учун миннатдорлик билдирди ва барча канадаликлар учун ишлашга ваъда берди. «Ўтмишдаги бўлиниш ва ғазабга чек қўяйлик. Биз ҳаммамиз канадаликмиз ва менинг ҳукуматим ҳамма учун ва ҳамма билан ишлайди», — деди у.
Бош вазир ўз нутқида Канада-Америка муносабатларини ҳам бир неча бор тилга олди. «Америка бизнинг еримизга, ресурсларимизга, сувимизга, мамлакатимизга ташна. Булар қуруқ таҳдидлар эмас. Трамп Америка бизни эгаллаб олиши учун синдирмоқчи. Бу ҳеч қачон, ҳеч қачон содир бўлмайди. Аммо биз ҳақиқатни англашимиз керак — дунёмиз тубдан ўзгарди», — дея қўшимча қилди Карни.
У Трамп билан иқтисодиёт ва хавфсизлик соҳаларидаги келажакдаги муносабатларни муҳокама қилмоқчилигини маълум қилди ва бу «икки суверен давлат» муҳокамаси бўлишини таъкидлади.
«Қўшма Штатлар билан барқарор ўсиб бораётган интеграцияга асосланган эски муносабатларимиз тугади. Қўшма Штатлар томонидан ўрнатилган очиқ глобал савдо тизими, Канада Иккинчи жаҳон урушидан бери таяниб келган тизим, мукаммал бўлмаса-да, ўнлаб йиллар давомида мамлакатимиз фаровонлигига ҳисса қўшган тизим тугади», — деди у.
60 ёшли Марк Карни Гарвард битирувчиси ва таниқли иқтисодчи. 13 йил давомида у Goldman Sachs`нинг Лондон, Токио, Нью Йорк ва Торонтодаги бўлинмаларида ишлаган. Карни 2008−2013 йилларда, жаҳон молиявий инқирозидан кейинги дастлабки йилларда Канада банкини бошқарган. 2013−2020 йилларда у Англия банкини бошқарган ва 1694 йилда Бирлашган Қироллик Марказий банки ташкил этилганидан бери илк бор мамлакатда туғилмаган Англия банки раисига айланган. Карни илгари ҳеч қачон сайланмаган ва фақат март ойида Трюдонинг ўрнига бош вазир бўлди.
Фото: gazeta.uz сайтидан олинди