Ўзбекистон терма жамоаси ҳужумчиси Элдор Шомуродов «Рома» клубининг апрель ойидаги энг яхши футболчиси деб топилди. Бу ҳақда клуб ўз Instagram саҳифасида маълум қилди.

Шомуродов «Рома»нинг апрелдаги 4 та ўйинида ҳам майдонга тушди. Хусусан, «Ювентус»га қарши ўйинда иккинчи таймда майдонга тушиб, 49-дақиқада гол урди ва жамоасини мағлубиятдан қутқариб қолди. Якуний ҳисоб 1:1.

«Верона»га қарши ўйинда асосий таркибда тушган Шомуродов 4-дақиқадаёқ рақиб дарвозасини ишғол қилди. Бу гол ўйинда ягона бўлиб қолди.

«Интер» билан бўлган баҳсда эса ўзбекистонлик ҳужумчи 22-дақиқада ассист қайд этди, голни Соуле киритди.

Фото: officialasroma / Instagram Фото: officialasroma / Instagram

Ўзбекистонлик ҳужумчи клуб расмий сайтидаги овоз бериш жараёнида 4 номзод орасида энг кўп овоз тўплаб, ой футболчисига айланди. Мухлислар танловига кўра, у Соуле, Свилар ва Ндикани катта фарқ билан ортда қолдирган.

Шомуродов ушбу мавсумда февраль ойининг ҳам энг яхши ўйинчиси бўлган эди.