ЕИ Мальтадан «олтин паспорт» беришни тўхтатишни талаб қилди – Газета.uz

Европа Иттифоқи суди Мальтанинг «олтин паспорт» — инвестиция эвазига мамлакат фуқаролиги бериш схемаси ЕИ қонунчилигини бузади, деган қарорга келди. Бу ҳақда Financial Times (FT) хабар берди.

«Европа Иттифоқига аъзо давлат олдиндан белгиланган тўловлар ёки инвестициялар эвазига ўз фуқаролигини, яъни Европа фуқаролигини тақдим эта олмайди, чунки бу фуқароликни олишни оддий тижорат битимига айлантириш билан баробар», — дейилади суд қарорида. Судга кўра, Мальта шу тариқа ЕИ шартномаси доирасидаги «ўз мажбуриятларини бажармаган».

FT`нинг ёзишича, Мальта бундай «инвестиция эвазига фуқаролик» схемасидан воз кечиши керак, акс ҳолда, унга жарима қўлланади. Мальта ҳукумати «бу қарорнинг ҳуқуқий оқибатлари батафсил ўрганилаётганини» эълон қилди.

2023 йилда Еврокомиссия Мальта томонидан «олтин паспортлар» берилиши муносабати билан Европа Иттифоқи Олий судига мурожаат қилганди, бу ЕКга кўра, Европа Иттифоқи «фуқаролиги моҳияти»га путур етказади. ЕК Мальта схемаси бутун иттифоқ учун оқибатларга олиб келишини таъкидлади, чунки Мальта фуқаролигини олган одамлар Европа Иттифоқининг исталган мамлакатида яшаш ва ишлаш ҳамда Европа сайловларида овоз бериш ҳуқуқига эга.

Мальта ҳукумати 2020 йилда схемани қайта кўриб чиққанини ва аризачиларга қўйиладиган талабларни кучайтирганини даъво қилганди.

Мальтанинг «олтин паспорт» бериш дастури 2013 йилдан бери мавжуд. Бундай паспортни олиш учун чет эллик миллий инвестиция фондига 600 000 евродан бошлаб сармоя киритиши, шунингдек, мамлакатда кўчмас мулк сотиб олиши керак. 2020 йил октябригача «олтин паспорт» эгалари Мальтада яшамаган бўлиши мумкин эди. Энди эса мамлакатда уч йил яшаш талаби бор. 750 000 евро сармоя киритганлар учун резидентлик талаби бир йилга қисқартирилиши мумкин.

Financial Times томонидан ўтказилган таҳлил шуни кўрсатдики, Мальта паспортини олган 16 киши сиёсий жиҳатдан фош этилган шахслар бўлган ёки кейинчалик санкцияларга учраган ёки жиноятлар учун судланган, дейилади хабарда.

Маълумот учун, Кипр (2020 йил) ва Болгария (2022) Брюсселнинг босими остида ўзларининг пулли фуқаролик схемаларини бекор қилган, бундай схемалар коррупция, пул ювиш ва солиқ тўлашдан бўйин товлаш хавфини келтириб чиқариши таъкидланган.

Аввалроқ Кипр ҳукумати 77 нафар чет эл фуқаросига берилган «олтин» паспортни бекор қилишга қарор қилгани, ушбу рўйхатда Алишер Усмоновнинг синглиси Гулбаҳор Исмоилова ҳам борлиги ҳақида ёзгандик.