Бу ҳақда EurasiaPluse ахборот агентлиги хабар берди.
АҚШ Ички хавфсизлик вазирлиги президент Шавкат Мирзиёевга Ўзбекистон, шунингдек, Қозоғистон ва Қирғизистоннинг 131 нафар фуқаросини депортация қилиш бўйича рейсни ташкил этишда кўрсатган ёрдами учун миннатдорлик билдирди. Нью Йоркдан Тошкентга парвоз 30 апрель куни Uzbekistan Airways авиакомпаниясининг Boeing-787 самолётида ташкил этилди.
«Ўзбекистон ўз фуқароларини депортация қилишни тўлиқ молиялаштирган ушбу операция давлатларимиз ўртасидаги чуқур хавфсизлик ҳамкорлигини таъкидлайди ва АҚШ иттифоқчилари учун стандарт вазифасини бажаради», — дейилади хабарда.
Таъкидланишича, ушбу ҳамкорлик президент Трамп ва унинг маъмурияти томонидан музокаралар олиб борилган хорижий ҳамкорлар билан муваффақиятли келишувларнинг энг сўнггиси ҳисобланади.
Fox News телеканалининг хабар беришича, Қозоғистон ва Қирғизистон фуқаролари Ўзбекистонга келиши билан ватанига жўнатилади.
Каналнинг қайд этишича, бу АҚШ ва бошқа давлат ўртасидаги Дональд Трамп президентлигининг иккинчи муддати бошланганидан кейин тузилган биринчи шундай келишув бўлиб, ундан олдин «дипломатик ҳамкорлик ойлари» ўтказилган.
Аввалроқ Ўзбекистон Ташқи ишлар вазирлиги ушбу рейс билан олиб келинаётган мамлакат фуқаролари сони 100 нафардан ортиқни ташкил этаётгани ҳақида хабар берганди.
Эслатиб ўтамиз, марказий осиёлик ноқонуний муҳожирларнинг илк рейсларини АҚШ Панама ва Коста Рикага жўнатган (120 ва 200 киши). АҚШ элчихонаси ходими «Газета.uz»га Дональд Трамп ҳокимиятга келганидан кейин давлатлар бу саъй-ҳаракатларни кучайтирганини маълум қилганди.
Ўшанда баъзи Америка ОАВлари муҳожирларнинг келиб чиққан мамлакатлари уларни қайтариб олишни истамаётгани ҳақида ёзган эди, бироқ Америка элчихонасидаги манба «Газета.uz»га маълум қилишича, АҚШ Ўзбекистон депортация бўйича Америка расмийлари билан ҳамкорлик қилмаётгани ҳақидаги «иддаони қатъиян рад этади». «Аксинча, Ўзбекистон икки томонлама фаол кун тартибининг тўлиқ спектри, жумладан, АҚШнинг муҳожирларни депортация қилиш бўйича сўровларига жавоб беришда АҚШнинг ишончли ва сезгир ҳамкори бўлган ва шундай бўлиб қолади», — деди у.
Фото: gazeta.uz сайтидан олинди