Бұл туралы EurasiaPluse ақпарат агенттігі хабарлады. Алматы қаласының мемлекеттік қуыршақ театры көрермендерге неміс жазушысы Отфрид Пройслердің «Кішкентай сиқыршы» повесі желісімен сахналанған «Орман ғажайыптары» спектаклін ұсынды.
Спектакльдің режиссері Антон Зайцевтың айтуынша, бұл туынды балалар әдебиетінің алтын қорынан орын алып, жақсылық пен зұлымдық, батылдық пен мейірім, адалдық пен ізгілік тақырыптарын қозғайды. Ертегі кейіпкерлерінің сахнаға келуі кітапқа деген сүйіспеншілікті арттыруда ерекше үлгі болып табылады.
«Орман ғажайыптары» қойылымының оқиғасы көне кітапханада өрбиді. Шаң басқан, ұмыт қалған кітаптар арасынан шексіз қиялға жол ашатын сиқырлы әлем пайда болады. Бұл – ертегілер әлеміне есік ашып, шынайы кейіпкерлерге толы ғажайып кітаптардың әлеміне саяхат.
Қойылымның басты мақсаты – балаларды кітап оқуға шақыру, оқу мәдениетіне қызығушылықты арттыру. Сахнадағы оқиғалар арқылы кітаптың тек қағаз бен әріптерден тұрмайтынын, нағыз тірі кейіпкерлермен толтырылған сиқырлы әлем екенін көрсету көзделген.
«Ұлттық кітап күні – бұл рухани байлыққа бас иіп, әдебиеттің қастерлігін насихаттайтын ерекше күн. Мемлекеттік қуыршақ театры осы мерекені кітап пен театр арасындағы алтын көпір арқылы атап өтуді ұйғарды», — дейді театр директоры Алмат Амангелді.
Сонымен қатар, Алматы қаласының орталықтандырылған кітапханалар жүйесімен бірлесіп, театр фойесінде балаларға арналған кітап көрмесі ұйымдастырылды.
Еліміздегі оқырманы ең көп 100 кітап анықталатыны да хабарланды.
Фото: inform.kz сайтынан алынды