Қазақстан Республикасы Қарулы күштерінің Құрлық әскерлері бас қолбасшысы генерал-майор Мереке Көшекбаев Сарыөзек гарнизонында орын алған қатардағы сарбаз Дастан Құрманбектің өліміне қатысты қызметтік тергеу нәтижелері туралы мәлімдеді.
Оқиғаның мән-жайы
2025 жылғы 14 қаңтарда Жетісу облысындағы Сарыөзек гарнизонында орналасқан 12/740 әскери бөлімінде қызмет атқарып жүрген сарбаз Дастан Құрманбек жүрегіне оқ атып, қайтыс болды.
Генерал-майор Мереке Көшекбаевтың айтуынша, бұл жағдай бойынша құқық қорғау органдары қылмыстық іс қозғап, тергеу амалдарын жүргізуде. Сонымен қатар, әскери бөлімде ішкі қызметтік тексеру ұйымдастырылған.
Алдын ала қорытынды
Мереке Көшекбаев сарбаздың өліміне байланысты алдын ала болжамын айтты:
«Қызметтік тексеру нәтижесінде әскери бөлімшеде сарбаздардың моральдық және психологиялық жағдайына тиісті деңгейде көңіл бөлінбегені анықталды. Әскери бөлім басшылығы уақытылы Дастанның сезімдері мен ішкі уайымдарын байқамаған. Осыған байланысты оған қажетті моральдық және психологиялық қолдау көрсетілмеген».
Ата-анасымен кездесу
Қайғылы оқиғаға дейін 8 қаңтар күні бөлім командирі Дастан Құрманбекпен жеке сөйлесіп, оның жағдайын анықтаған. Сондай-ақ, 12 қаңтарда сарбаздың ата-анасы әскери бөлімге келіп, ұлдарымен жүздескен.
«Сарбаз күні бойы ата-анасымен бірге уақыт өткізген. Қайтып келген соң, ешқандай шағым немесе келіспеушілік байқалмады,» – деді Мереке Көшекбаев.
Тергеу жалғасуда
Генерал-майор толық ақпаратты тергеу аяқталғаннан кейін ғана жариялауға болатынын айтты. Қазіргі уақытта тергеу амалдары жалғасуда.