Алматы қалалық спорт басқармасының басшылығына үміткерлерді іріктеу бойынша комиссия отырысында 3 адамның кандидатурасы жан-жақты талқыланған.
Үміткерлер арасында Алматы қаласы әкімі аппараты басшысының орынбасары Дархан Нұрханұлы, Алматы қаласы cпорт басқармасы басшысының орынбасары Бекжан Онжан Нұрланұлы мен Бейжің Олимпиадасының жүлдегері, Алматы облысы, Кеген ауданының әкімі Нұрбақыт Теңізбаев та бар.
«Комиссия мүшелері әр кандидаттың спорт саласындағы тәжірибесін, өңір спортының даму перспективаларына қатысты көзқарасын және спорт менеджменті саласындағы біліктілігін бағалады. Кандидаттарды жергілікті атқарушы орган ұсынады, ал тағайындау тек ҚР Туризм және спорт министрлігі жанынан құрылған комиссияның оң қорытындысын алған жағдайда жүзеге асырылады», – делінген министрлік таратқан хабарламада.
Нұрбақыт Теңізбаев 1983 жылы 10 сәуірде Алматы облысы, Панфилов ауданы, Үшарал ауылында туған. Ол – грек-рим күресінен бірнеше дүркін Азия чемпионатының жүлдегері, 2008 жылғы Бейжің олимпиадасының жүлдегері.
Сондай-ақ, 2009 жылы әлем чемпионатының қола медалін еншілеген. Данқты спортшы қазіргі уақытта Алматы облысы, Кеген ауданының әкімі қызметін атқарады.