Милдеттүү ОСАГО жана кыймылсыз мүлктү каттоо эрежелери. Садыр Жапаров мыйзамдарга кол койду

АКИpress –  Президент Садыр Жапаров 24-апрелде «Кыргыз Республикасынын айрым мыйзам актыларына өзгөртүүлөрдү киргизүү жөнүндө» мыйзамга кол койду. Бул мыйзам «Кыймылдуу жана кыймылсыз мүлккө укуктарды жана алар менен түзүлгөн бүтүмдөрдү мамлекеттик каттоо жөнүндө», «Күрөө жөнүндө» жана «Кыргыз Республикасындагы жол кыймылы жөнүндө» мыйзамдарына түзөтүүлөрдү киргизүүнү карайт. Бул тууралуу Мамлекеттик финансылык көзөмөл кызматынын басма сөз кызматы билдирди.

Кабыл алынган өзгөртүүлөр төмөнкү мыйзам актыларына тиешелүү:

• «Кыргыз Республикасындагы жол кыймылы жөнүндө» мыйзам — транспорт каражаттарынын ээлери эми жарандык-укуктук жоопкерчиликти милдеттүү камсыздандыруу келишимин (ОСАГО) түзүүгө милдеттүү;
• «Кыймылдуу жана кыймылсыз мүлккө укуктарды жана алар менен түзүлгөн бүтүмдөрдү мамлекеттик каттоо жөнүндө» мыйзам — турак жайларга укуктарды каттоодо өрттөн жана табигый кырсыктардан милдеттүү камсыздандыруу полисин көрсөтүү зарыл;
• «Күрөө жөнүндө» мыйзам — күрөөгө коюлган мүлктү камсыздандыруу тартиби такталды жана күрөө кармоочуга камсыздандыруу төлөмүнө карата артыкчылыктуу укук белгиленди.

Бул мыйзам жарандардын мүлктүк укуктарын күчөтүүгө жана өзгөчө кырдаалдарда каржы коопсуздугун камсыз кылууга багытталган.

Мыйзам расмий жарыялангандан кийин 10 күндөн кийин күчүнө кирет.

Маалымат үчүн:

2025-жылдын 20-мартында Жогорку Кеңеш «Камсыздандыруу жана камсыздандыруу иши жөнүндө» мыйзамды жаңы редакцияда кабыл алган, ага 29-апрелде президент Садыр Жапаров кол койгон.

Маселенин тарыхы

Министрлер кабинети 2024-жылы 2025-жылдын 1-январынан тарта жеке жактар үчүн ОСАГО полиси жок болгон учурда айып пул салууну киргизүүнү пландаган, бирок айып пул салуу 2025-жылдын 1-июлуна чейин жылдырылган.

Жеке жактар үчүн ОСАГОнун жоктугу үчүн айып пул 30 эсептик көрсөткүчтү ( 3 миң сом) түзүшү керек болчу.

2023-жылдын 1-апрелинен тарта башка мамлекетте катталган транспорт каражаттарынын ээлерине же айдоочуларына, ошондой эле юридикалык жактарга, анын ичинде мамлекеттик органдарга жана жергиликтүү өз алдынча башкаруу органдарына карата айыптык чаралар колдонулуп келет. Юридикалык жактар үчүн ОСАГО полиси жоктугу үчүн айып пулдун өлчөмү 130 эсептик көрсөткүчтү (13 миң сом) түзөт.