Кегети айылынын тургундары имамына унаа белек кылышты

Turmush — Чүй облусунун Чүй районуна караштуу Кегети айылынын имамы Осмон Качкын уулуна айыл эли унаа белек кылышты. Бул тууралуу аймактык кабарчыга жергиликтүү тургундар билдиришти.

Маалым болгондой, Осмон Качкын уулу 30 жылдан бери айылга имам болуп, ак кызмат кылып келет.

«Анын чоң атасы жана өз атасы дагы ушул эле айылда имам болушкан. Булар атадан балага 3 муун өтүп, имам болуп келишүүдө. Айыл эли Осмондун жана анын ата-бабасынын кызматын урматтап, ашар жолу менен унаа белек кылышты. Ошондой эле имамдын жардамчысына үч дөңгөлөктүү электр арабасын белек кылышты», – деп айтылат маалыматта.